Our Hometown Run

Boxing Day清晨十度寒風, 飲飽食醉後更難擺脫暖暖被窩。久休復出的Tony約練跑, 努力備戰的Nelson漸入佳境, 懶惰的我不敢放鬆, 深呼吸一口氣便彈出床邊, 準時7am到北潭涌起跑。這麥徑的第一段, 算是我們的Hometown, 一年四季上落來回無數次, 仍覺得風景優美得令人心醉, 不枉捱凍早起。

Tony養傷後第一課要試腳不能急進, 但又想有質感, 我們決定不計時光跑25km。說來輕鬆, 十度寒風下首次全程著住風褸唔想除, 十度加強風下堤壩上不能跑直線。風景仍然優美, 心曠卻難神怡, 呼呼奪人的風聲正測試我們來練跑的誠意。

好消息, 我們先跑到壩底回頭再往西灣亭方向跑上一段長命斜, 做足所有嘢跑回北潭涌停車場, Tony後段還越跑越快, 可喜可賀。最後嘆返個丁麵暖身, 吹吹水心滿意足。

TC, 我哋有新計劃想頭等你一齊討論, 快D好番啦!!

師傅有命

精B隊員中，TC和Nelson仔大女大，Tommy惜貨未沽，我是正牌仔細老婆嫩。四個中年人通山跑，一年比一年谷得厲害，身體負荷不是說笑，各類毛病自然頻生。我有家庭負擔，但又放肆去谷，其實我有靠山 ─ 我的中醫「師傅」。

做了幾十年人，睇了無數不同派別、風格的醫生，我認為不管睇邊一個醫生，歸根究底講一個字︰「夾」，重點是病人同醫生夾唔夾，啱唔啱Key。操練攪到腰傷腳傷，這幾年來我訪尋中西名醫，你有介紹，我一定起碼睇一次。醫生的建議通常是︰「嘩，你咁嘅身細重咁搏，唔好跑山，不如轉游水啦。」游水一出，我便帶着笑容說Thank you，從此永別。我睇醫生係想你話俾我知要點樣做才可以繼續跑，游水唔使你講。

兩年前，KK介紹了「師傅」俾我，我就是在這時候開始膽生毛，開始搏命，把目標一年比一年提高，因為我知道萬大事有「師傅」做後盾。

「師傅」對運動創傷，特別是跑步引起的創傷，有他的見解。我一睇過就Buy到十足，這兩年我的成績有一大部分歸功於「師傅」；準確一點，歸功於我因為有師傅做後盾而建立起自信。

有時痛到飛起，睇完「師傅」，我問︰「睇怕都要休息幾日？」「師傅」故作意外︰「幾日！......休息兩日夠啦。」他從來冇提過游水，我鍾意。

做超級毅行者的代價有幾大？昨日睇「師傅」，他第一次對我說，呢次有D嘢，傷咗靱帶，要好好休息，兼要覆診。兩年來第一次咁大鑊，好彩在大賽後才爆發出來，這是過去一段時間意志戰勝身體，抑或巧合？

點都好，我聽話，好好休息。

毅行之後

毅行之後一切回歸平靜, 各人都要還一還債。身體要恢復元氣, 有病就要發出來籍此調理一下。賽後才知道受了傷的更要專心養傷, 勿成傷患無得再衝。工作加快節奏頻密出差, 星期六日都埋頭苦幹。做父親, 丈夫, 男友, 做仔, 做朋友都要還一還, 做超級毅行者背後是一項龐大工程。

精B很努力地兼顧生活靈活多變, 為的都是想爭取享受運動的樂趣。四人暫無集訓, Tony跑寶雲道來來回回總之要跑夠里數, TC賽後有點腳腫不宜硬碰路面, 密密跑機保持狀態。我返回北潭涌跑20km為主, 先練速度後再加長。Nelson跟名師學跑姿, 誓要擺脫Run On Empty的痛苦回憶, 迎戰渣打全馬。

除了TC, 我們全是馬拉松的初哥, 心情緊張不敢怠慢。