Monday, August 30, 2010

The Most Glorious Run

精B昨日開始操麥徑,經過幾個月跑步操練和多課大東鳳凰,我們都充滿信心。今日操3至5段,預計時間是7至7.5小時。過去幾個星期,我們都覺得是「賺咗」,因為天氣應熱而不太熱,操練感覺算舒服。不過今日出事,猛陽光加冇風,出汗指數高企。行完第3段,Nelson 已感體力不足,於是我們拖慢速度,但他愈行愈感不適。我們形容這情況為「冧咗」,毅行者都知道這感覺,一定領教過,整個人由頭到腳冇力,心口作悶想嘔,只想坐低休息。

精B這幾年受TC訓練,遇到這種情況,立即啟動應變措施,包括以下三招︰

一、想坐低就坐低,坐到夠為止,另外三個人繼續吹水,當無嘢。
二、由冧者帶頭,他來決定速度。許多時冧者在後面不好意思出聲,追到氣咳,愈行愈弱,最後中途剪帶。
三、幫冧者拿背囊,這時候冧者身上多條毛都嫌重,讓他輕鬆上路,儘快恢復體力。

使出這三招是基於一個重要假設,就是我們經過長時間訓練,有底,冧極有個限度。假如讓冧者重拾心理上的自信和身體上的體能,不消一會又是一條好漢,失去的時間可以追番,重點是千方百計讓冧者儘快復完。

今日精B發揮得淋漓盡致,最後Nelson 昂然行完,時間是8小時10分,比預計長了,但精B自信心上升不少 ─ 冧咗都行得完。

2 comments:

  1. 唔知你聽過未, 「行內」有另一個常用詞彙, 叫「爆左」。通常爆左都keep住行得晒目標「里數」, 功力就會大幅提升喇。

    ReplyDelete
  2. 爆咗,冧咗,應該係同一樣嘢,所有毅行者都試過,能夠行得完,功力當然提升。

    ReplyDelete