星期一午餐

星期一公司靜侷，Paul冇約人食晏，拉了我出去。

Paul：星期日去咗邊度玩?

我：兩個月後要參加馬拉松，星期日練長課。

Paul：幾長叫長？

你：28公里。

Paul：28公里！揸車揸28公里人都攰，你咁樣折磨自己。

我：唔 ..... 跑慣咗，OK嘅。

Paul：我真係唔明你哋，得閒輕鬆跑步，對身體好，我贊成，但好似你咁跑二三十公里，有乜謂呢？

我開始察覺到這對話將進入無建設性階段，要儘快轉話題。

我：你呢，你星期日做乜？

Paul：唔好講我住，講番你嘅28公里，喂，跑28公里有乜咁過癮？我睇電視見到長跑者，未見過一個面帶笑容，全部愁眉苦臉，死老豆咁樣，我唔相信佢哋Enjoy長跑，我覺得攞苦嚟辛。

我一時之間唔知點回應，長跑者的確很少面帶笑容，跑步史上最出名長跑者沙道柏，跑時面部表情似背上被插一刀，但想深一層，一個人專注做一件事，面部表情自然變得認真，正如我也未見過面帶笑容的小提琴家或作家。

我：唔笑不代表辛苦。

Paul：真係唔明你哋，你搵日嚟我屋企幫手清潔，我以為人係追求快樂的動物，你哋竟然追求辛苦。

我：跑步的確係難，跑步者或者從困難中得到滿足感。

Paul：滿足感？喂，你唔後生，咁辛苦？你仔細老婆嫩，我成日聽到「中年漢跑步猝死」，第日我要加倍留意這類新聞，睇住有邊個係我識。

我：义住你把口。

Paul：新聞唔係我作，年年都有幾個好似你哋咁嘅人，話要挑戰自己，尋求突破，其實在玩命。

我已經唔想再搭嘴，低下頭食嘢。

Paul：唔好話冇命咁嚴重，跑步好傷膝頭，你第日老咗就知。

我：我..... 我膝頭.....無乜大問題。

Paul：你唔使死撐，我早排見到你拐下拐下，一定係跑步受傷。第日我見到需要揸拐杖的老人家，問佢哋後生時是否沉迷跑步。

我：唔該埋單。

呢個故事教訓跑步者，長跑或比賽後兩三日，避免跟非跑步者提起跑步，他們不會明白。提醒自己，星期一午餐買飯盒。

蔡東豪 逢星期五刊於《蘋果日報》金融中心版